[27] เหตุยา ตีณิ, อารมฺมเณ ตีณิ…เป.… อวิคเต ตีณิ (สํขิตฺตํ)ฯ
นเหตุยา ทฺเว, นอธิปติยา ตีณิ…เป.… (สํขิตฺตํ)ฯ
(สหชาตวารมฺปิ…เป.… สมฺปยุตฺตวารมฺปิ ปฏิจฺจวารสทิสํ)ฯ
เหตุ-อารมฺมณปจฺจยา
[28] กุสโล อรูปี ธมฺโม กุสลสฺส อรูปิสฺส ธมฺมสฺส เหตุปจฺจเยน ปจฺจโยฯ (1)
อกุสโล อรูปี ธมฺโม อกุสลสฺส อรูปิสฺส ธมฺมสฺส เหตุปจฺจเยน ปจฺจโยฯ (1)
อพฺยากโต อรูปี ธมฺโม อพฺยากตสฺส อรูปิสฺส ธมฺมสฺส เหตุปจฺจเยน ปจฺจโยฯ (1)
กุสโล อรูปี ธมฺโม กุสลสฺส อรูปิสฺส ธมฺมสฺส อารมฺมณปจฺจเยน ปจฺจโย… ตีณิฯ
อกุสโล อรูปี ธมฺโม อกุสลสฺส อรูปิสฺส ธมฺมสฺส อารมฺมณปจฺจเยน ปจฺจโย… ตีณิฯ
อพฺยากโต อรูปี ธมฺโม อพฺยากตสฺส อรูปิสฺส ธมฺมสฺส อารมฺมณปจฺจเยน ปจฺจโย (สํขิตฺตํ)ฯ
[29] เหตุยา ตีณิ, อารมฺมเณ นว, อธิปติยา สตฺต…เป.… อวิคเต ตีณิ (สํขิตฺตํ)ฯ
(ยถา กุสลตฺติเก ปญฺหาวารํ, เอวํ วิตฺถาเรตพฺพํฯ)
1-12. กุสลตฺติก-โลกิยทุกํ
1-7. ปฏิจฺจวาราทิ
ปจฺจยจตุกฺกํ
เหตุปจฺจโย
[30] กุสลํ โลกิยํ ธมฺมํ ปฏิจฺจ กุสโล โลกิโย ธมฺโม อุปฺปชฺชติ เหตุปจฺจยาฯ กุสลํ โลกิยํ ธมฺมํ ปฏิจฺจ อพฺยากโต โลกิโย ธมฺโม อุปฺปชฺชติ เหตุปจฺจยาฯ กุสลํ โลกิยํ ธมฺมํ ปฏิจฺจ กุสโล โลกิโย จ อพฺยากโต โลกิโย จ ธมฺมา อุปฺปชฺชนฺติ เหตุปจฺจยาฯ (3)
อกุสลํ โลกิยํ ธมฺมํ ปฏิจฺจ อกุสโล โลกิโย ธมฺโม อุปฺปชฺชติ เหตุปจฺจยา… ตีณิฯ
อพฺยากตํ โลกิยํ ธมฺมํ ปฏิจฺจ อพฺยากโต โลกิโย ธมฺโม อุปฺปชฺชติ เหตุปจฺจยาฯ (1)
กุสลํ โลกิยญฺจ อพฺยากตํ โลกิยญฺจ ธมฺมํ ปฏิจฺจ อพฺยากโต โลกิโย ธมฺโม อุปฺปชฺชติ เหตุปจฺจยาฯ (1)
อกุสลํ โลกิยญฺจ อพฺยากตํ โลกิยญฺจ ธมฺมํ ปฏิจฺจ อพฺยากโต โลกิโย ธมฺโม อุปฺปชฺชติ เหตุปจฺจยา (1) (สํขิตฺตํฯ)
[31] เหตุยา นว, อารมฺมเณ ตีณิ…เป.… อวิคเต นว (สํขิตฺตํ)ฯ
ปจฺจนียํ
นเหตุปจฺจโย
[32] อกุสลํ โลกิยํ ธมฺมํ ปฏิจฺจ อกุสโล โลกิโย ธมฺโม อุปฺปชฺชติ นเหตุปจฺจยาฯ (1)
อพฺยากตํ โลกิยํ ธมฺมํ ปฏิจฺจ อพฺยากโต โลกิโย ธมฺโม อุปฺปชฺชติ นเหตุปจฺจยาฯ (1) (สํขิตฺตํฯ)
[33] นเหตุยา ทฺเว, นอารมฺมเณ ปญฺจ, นอธิปติยา นว…เป.… โนวิคเต ปญฺจ (สํขิตฺตํฯ สหชาตวารมฺปิ…เป.… สมฺปยุตฺตวารมฺปิ ปฏิจฺจวารสทิสํ)ฯ
เหตุ-อารมฺมณปจฺจยา
[34] กุสโล โลกิโย ธมฺโม กุสลสฺส โลกิยสฺส ธมฺมสฺส เหตุปจฺจเยน ปจฺจโย… ตีณิฯ
อกุสโล โลกิโย ธมฺโม อกุสลสฺส โลกิยสฺส ธมฺมสฺส เหตุปจฺจเยน ปจฺจโย… ตีณิฯ
อพฺยากโต โลกิโย ธมฺโม อพฺยากตสฺส โลกิยสฺส ธมฺมสฺส เหตุปจฺจเยน ปจฺจโยฯ (1)
